تحدثت الفنانة منة شلبي، عن أسباب خلافها مع الفنانة هند صبري منذ بداية انطلاقهما بعالم السينما، وأشارت الفنانة بأنهما لم يكن بينهما خناق، ولكنهما لم يتفقا معاً.
وأكدت الفنانة، أثناء استضافتها ببرنامج “سهرانين”، والذي يقوم بتقديمة الفنان أمير كرارة، والذي يُذاع من خلال منصة “watch it”، بأن علاقتها بالفنانة هند صبري لم تكن جيدة منذ بدايتهما الفنية، وعلقت:ـ “مكنش لينا في بعض أوي، ومكنش في بينا مشاكل وخناقات.. بس مكنش في بينا حب”.
وواصلت منة:ـ “إحنا الإتنين طلعنا مع بعض، وهى ساعتها كانت بتعمل فيلم مواطن ومخبر وحرامي ومذكرات مراهقة، وأنا كنت بعمل الساحل وبحب السيما، والأدوار اللي كنا بقدمها وقتها كانت جريئة ومفيش إتفاق بينا”.
وتابعت الفنانة:ـ “وفي الفترة دي انطلقنا مع بعض، وكان في ناس بتيجي تسخنا على بعض، واللي يقولي دي مش بتحبك ويروحوا ليها ويقولوا نفس الكلام، وساعتها أنا كنت بقول لنفسي إزاي يعني؟، وبعد فترة اشتغلنا مع بعض في فيلم أحلى الأوقات، وكل وحدة فينا كان كتفها عالي على التانية بس كان في احترام مُتبادل، وكان موجود معانا أحسن حكم وست البنات حنان ترك”.
وأضافت:ـ “وبرغم من إننا مش قربيين من بعض، ولكن كان في ود كبير كان السبب فيه حنان، وده علشان هى كانت قريبة مننا إحنا الإتنين، وبعد ما خلص فيلم أحلى الأوقات محصلش حاجة بينا ولا حرب ولا سلم”.
وأنهت حديثها:ـ “ولما اتعرض علينا فيلم بنات وسط البلد.. المخرج محمد خان كلمني وأنا وافقت على طول، وقولت معنديش مشكلة وروحنا نعمل بروفة قراءة عنده في البيت بالمعادي، وقبل ما أفتح النسخة بصيت لهند وقولتلها في موضوع عاوزاكي فيه، وهى ردت عليا وقالت ماشي وأنا عاوزاكي، وساعتها الحقيقية ظهرت وإن في ناس كانت بتوقع بينا وانتهى سوء التفاهم”.
المصدر: موقع نجوم مصرية.
