قام المطرب الشعبي المعروف حسن شاكوش، بتوجيه رسالة شكر لطليقة ريم طارق، وأشار بأنه تم الصلح بينهما وأنهى جميع خلافاته معها بشكل ودي.
وقامت طليقة الفنان، بنشر مقطع فيديو لحسن شاكوش عبر حسابها الرسمي على موقع التواصل الإجتماعي “انستجرام”، حيث قال: “أنا حابب أقول في الفيديو ده، إني أنا وريم حبايب ومفيش أي خلافات بينا، ومن خلال الفيديو ده بشكر ريم جداً وبقولها إنتي قولتي كلمة حق، وإنك مشفتيش مني حاجة مش كويسة، وحقيقي أنا قبلت إعتذارك وبتمنى ليكي النجاح والسلامة فيما هو قادم من حياتك”.
وواصل شاكوش: “وبجد بشكر كل الناس اللي اتدخلوا، وكلموني علشان أنهي الموضوع ده، وحقيقي بشكرهم جداً علشان تعبوا معايا، وبقول لكل الصحفيين والإعلاميين اللي أكيد هما على راسي من فوق.. إحنا خلاص مش موجود بينا مشاكل ولا خلافات، وهى في الأول والأخر كانت مراتي ومكنش يصح إني أتكلم في حقها مهما حصل، والحمد لله الموضوع خلص على خير وصفينا كل خلافاتنا، ودلوقتي بقينا حبايب وربنا يقدر الجميع على فعل الخير، وبوجه التحية والشكر لكل الناس اللي بتحب ريم وبتحبني”.
وقامت ريم طارق، بالرد على شاكوش: “وأنا كمان بتمنى ليك الخير يا حسن ومزيد من النجاح، وأكيد إحنا حبايب وحابه أقول حاجة للناس اللي متابعه مشكلتنا من البداية.. ياريت محدش يتدخل في مشاكلكم الشخصية مهما حصل، وده حتى لو أقرب الناس ليكم، علشان المشكلة ممكن تزيد وتتصعب مش تتحل بالرغم من حبهم الشديد ليكم، وهو ده اللي حصل معانا بالظبط.. يمكن الخلاف اللي بينا لو كان بينا بس كان خلص من زمان، وأنا كمان بشكرك يا حسن وإنك وعدت ووفيت بالوعد.. وفي النهاية لله الأمر”.
