منى عبدالغني توجه رسالة هامة لـ الفتيات: «متخليش شاب يضحك عليكي ويركع أمامك وحافظي على نفسك»

وجهت الإعلامية منى عبدالغني، بعض النصائح الهامة للفتيات، وطالبت إياهن المحافظة على كرامتهن، وأن يعودن مرة ثانية إلى قيم وعادات المجتمع المصري.

وأكدت الإعلامية، أثناء تقديمها لبرنامج “الستات ما يعرفوش يكدبوا”، والمُذاع عبر فضائية “cbc”، موضحة: “حابه أوجه شوية رسايل للفتيات علشان تحافظوا على كرامتكم وتعززوا من نفسكم، وأولها إوعي تحلي شاب يضحك عليكي بكلمتين والسلام، ويقولك إنتي حبيبتي ونور عيني ومراتي وهتجوزك، ويروح جاي وإنتي مع أصدقائك ويركع على رجله أمامك ويديكي خاتم، وأصدقائك يفرحوا ويهيصوا ويقولوا عليكي إنك محظوظة أوي”.

وواصلت منى عبدالغني: “وأنا بقولك الكلام ده علشان الحاجات دي جديدة علينا وعلى مجتمعاتنا وثقفاتنا، (وليس البر بأن تأتوا البيوت من ظهورها ولكن البر من اتقى واتوا البيوت من أبوابها واتقوا الله لعلكم تفلحون)، وهو الشخص ده بيعمل معاكي كده ليه؟، وساعتها بتقولي لوالدك إيه؟.. أنا اتخطبت يابابا ولا إيه؟”.

وأضافت الإعلامية: “وعلى فكرة الشخص اللي بيحب واحدة بيخبط على الباب، ولو انتي كنتي سهلة معاه هيكون عارف إنك مش ممكن تكوني أم لأولاده، ولو حتى اتجوزك الجوازه هتفشل، والشخص لو اتقدم لبنت بصورة رسمية بيكون في حاجة اسمها كرامة واحترام، وأي راجل في الدنيا بيحترم البنت اللي بتحترم أهلها وبتحافظ على نفسها، ومش بس كده ده كمان بيحافظ عليها وبيحبها أوي، وده علشان هو عارف إنها هتصونه وتحافظ عليه وعلى بيته واولاده، وممكن يخرج كتير من البيت ويسبها وهو مطمن”.

وأنهت حديثها: “مفيش مشكلة خالص انكم تحبوا بعضكم، ولكن بشرط الحب ده يكون في النور وبعلم الأسرة، وياريت بقا نرجع لورا شوية لقيم وعادات المجتمع المصري، والناس تستحي من ربنا ونخاف على بعض أكتر من كده ونراعي بعض”.

المصدر: موقع نجوم مصرية.